Санхүүгийн зохицуулах хорооны дарга, доктор С.Даваасүрэн The Alliance for Financial Inclusion /AFI/ буюу Санхүүгийн хүртээмжийн нийгэмлэгийн энэ оны 9 дүгээр сард хуралдсан Дэлхийн Бодлогын чуулганаар тус нийгэмлэгийн Захирлуудын зөвлөлийн гишүүнээр сонгогдон ажиллаж байна.
Захирлуудын зөвлөлийн 10 дугаар хуралдаан боллоо. Интернэтийн холболт ашиглаж, цахим хэлбэрээр явуулсан дүрст хуралдаанд Захирлуудын зөвлөлийн дарга, Бразилын Төв банкны дэд ерөнхийлөгч, доктор Исаак Сидней Феррейра, дэд дарга, Бангладешийн төв банкны ерөнхийлөгч, ноён Фазле Кабир болон нийт гишүүд, Гүйцэтгэх захирал, Зөвлөлийн саналын эрхгүй гишүүн Алфред Ханниг тэргүүтэй гүйцэтгэх удирдлага оролцлоо. Хуралдаанаар, Нийгэмлэгийн Гүйцэтгэх захирал товч мэдээлэл хийж, Дэлхийн Бодлогын чуулганы үеэр болсон Захирлуудын зөвлөлийн 9 дүгээр хурлын тэмдэглэл, Нийгэмлэг болон Азийн хөгжлийн банк хооронд байгуулсан Харилцан ойлголцлын санамж бичиг зэрэг баримт бичгүүдийг юуны өмнө батлан баталгаажууллаа.
Түүнчлэн Нийгэмлэгийн бодлогын хороод болон гүйцэтгэх удирдлага, менежментийн багийн тайланг дүгнэж, ирэх онд тус баг ямар стратегийн төлөвлөгөө, бүтэц бүрэлдэхүүн, төсөв зардалтайгаар ажиллахыг хэлэлцэн баталлаа. Энэ хүрээнд Нийгэмлэгт хийсэн байгууллагын бүтэц, зохион байгуулалт, засаглал, санхүүгийн үйл ажиллагааны талаарх аудитын үнэлгээ, дүгнэлт зэргийг хэлэлцээд, зөвлөмж өгч, уг зөвлөмжийн дагуу Төсөв, санхүүгийн хороогоор хянуулахаар тогтов.
Мөн хуралдаанаар, Захирлуудын зөвлөлийн дараагийн хуралдааныг товлосон бөгөөд 11 дүгээр хуралдаан ирэх 2018 оны дөрөвдүгээр сарын 19, 20-ны өдрүүдэд Вашингтон хотноо болно.
