Улс төрөөс зай барьж хэсэг хугацаанд нам гүмхэн байсан Л.Гүндалай 2016 оны сонгуулийн сургаар улс төрд эргэн ирсэн. Тэрбээр хамгийн түрүүнд сонгуулийн шоугаа эхлүүлж “Ард түмнээ хайрлая” гэх сүржин нэртэй нам хүртэл байгуулаад амжсан. Хамгийн сүүлд гэхэд л Л.Гүндалай “Монголоороо байгаасай” уран бүтээл хийж, цахим ертөнцөд сэдэв нь болоод байна.
Түүний бүтээлийг 280 мянган хүн үзэж, 3800 хүнд таалагдаж, тэр хэмжээний хүн цааш нь түгээсэн ч ихэнх нь түүнийг элэглэж, эрүүл эсэхэд нь эргэлзсээр байна.
Түүнчлэн “Монголоороо байгаасай” дууг зохиосон зохиогч, дуулсан дуучдаас албан ёсны зөвшөөрөл авалгүй клип хийлгэсэн хэмээн оюуны өмчийн бүтээлийг хулгайлсан хэргээр шалгуулахаар дээрээ тулаад байгаа аж. Учир нь тэрбээр зөвшөөрөлгүй дууг нь дуулж дүрсжүүлсэнээс гадна дууныхаа үгийг өөрөө зохиосон мэт “Үг: Цогжилт, Л.Гүндалай” хэмээн бичсэн нь олон хүнд эргэлзээ төрүүлээд байгаа юм.
Энэ талаар МУГЖ Б.Дашдондог нэлээд ширүүхэн мэдэгдээд байгаа бол энэ дууны эзэн “Харсарнай” хамтлагийн С.Амармандах өөр зүйл ярьж байна. Зөвшөөрөлгүй дуулж дүрсжүүлсэн дууны талаар С.Амармандахаас тодруулахад: -“Л.Гүндалай энэ талаар надад мэдэгдсэн. Таван жилийн өмнө та нарын дуулсан “Монголоороо байгаасай” гэдэг сайхан уран бүтээл байдаг юм байна. Энэ дууг чинь би дуулмаар байна гэсэн. Ер нь миний болоод манай хамтлагийнхны дууг урлагийнхан дуулсан тохиолдол цөөнгүй бий. Л.Гүндалайгийн тэр клипийг би өчигдөр үзсэн. Харин авторын асуудлыг нь анзаараагүй юм байна” хэмээлээ.
