-10o
Улаанбаатар хот
mobile menu

Ц.Цогзолмаа: Үнэлгээг сайжруулж, асуудлыг системтэй харах хэрэгтэй

2018-05-23 16:00:00

      

Боловсрол, соёл, шинжлэх ухаан, спортын яамнаас 21 аймгийн Боловсрол, соёл, урлагийн газрын дарга, ахлах мэргэжилтэн, нийслэлийн Боловсролын газар, дүүргийн Боловсролын хэлтсийн дарга, мэргэжилтнүүдэд зориулсан “Үр дүнд суурилсан үнэлгээний шинэчлэл” сургалтыг энэ сарын 21-23-нд зохион байгууллаа.

            Энэ удаагийн сургалтаар дэлхийн болон боловсролын хөгжлийн чиг хандлага (аж үйлдвэрийн 4 дэх хувьсгал), даяаршсан эрин зуунд өөрийн орны боловсролын ололт, амжилт, монгол сурган хүмүүжүүлэх ухааны уламжлалыг хэрхэн хадгалан хөгжүүлэх боломж, боловсролын үнэлгээний талаар нэгдсэн ойлголтод хүрэх зорилгын талаар мэдээлэл өглөө. Сургалтын үеэр Боловсрол, соёл, шинжлэх ухаан, спортын сайд Ц.Цогзолмаа хэлэхдээ, “Үр дүнд суурилсан үнэлгээний шинэчлэл ойлголт зөв байхаас эхэлнэ. Мэдээж сургалтын хөтөлбөр, агуулга, сурах бичиг, багшийн ур чадвар гээд онолын хувьд анхаарч үзэх ёстой олон асуудал бий. Эдгээрийг сайжруулахын төлөө бид шат дараатай ажлуудыг зохион байгуулж, улсын зөвлөгөөнүүдийг хийсэн. Харин зөвлөгөөнөөс гарсан зөвлөмжийг амьдрал дээр хэрэгжүүлэх нь бидний үүрэг. Хичээлийн шинэ жил дуусахаас өмнө салбарын бодлогыг бүх шатанд хэрэгжүүлж, үүнийг хэрэгжүүлэгч хэн ч боловч бүгд нэгдсэн мэдлэг, мэдээлэлтэй болох нь чухал. Нөгөөтэйгүүр, боловсролын салбарт хийхээр төлөвлөсөн олон ажил байна. Тэдгээрийн үнэлгээг ямар байдлаар сайжруулж, асуудлыг системтэй олж харах чадварыг багш, удирдлагуудад эзэмшүүлэхээс ажил эхлэх нь зүйтэй. Та бүхэн сургалтын туршид өөрт хэрэгтэй олон мэдээллийг олж авч, эргэлзээтэй байсан асуултууддаа хариулт авсан гэдэгт итгэлтэй байна” гэсэн юм.  

Боловсролын үнэлгээний талаарх дэлхийн нийтийн чиг хандлагад нийцүүлэн ерөнхий боловсролын үнэлгээний арга зүйг шинэчлэх бодит хэрэгцээ, шаардлага бий болсны дагуу гурван өдрийн турш  үнэлгээний асуудлаар ийн хэлэлцлээ. Ялангуяа, ерөнхий боловсролын салбар дахь сургууль, багш, суралцагчийн үнэлгээг уялдаа холбоонд нь харилцан хамааралтай цогцоор нь шинэчлэх, суралцагчийн мэдлэг чадварыг үнэлэхээс гадна хандлага төлөвшлийг үнэлэх асуудлыг сургалтаар хөндөн ярилцаж, санал авсан юм. БСШУСЯ-ны Ерөнхий боловсролын бодлогын газрын дарга Т.Ням-Очир “Энэхүү сургалтаар 2018 оны 1, 2 дугаар сард яамнаас зохион байгуулсан “Тогтвортой хөгжил” улсын зөвлөгөөнөөс долоон түвшинд 92 багц асуудлаар гаргасан зөвлөмжийг орон нутгийн түвшинд  хэрэгжүүлж буй ажлын үр дүнгийн талаар хэлэлцэж, чиглэл өглөө. Мөн 2017-2018 оны хичээлийн жилийн сургалт, хүмүүжлийн ажлын үр дүнгийн талаар аймаг бүр тайлангаа хэлэлцүүлж, 2018-2019 оны хичээлийн зорилго зорилтоо тодорхойлох, багш нарын бага хурал, сургалт, семинаруудын зохион байгуулалтын асуудлаа ярилцлаа” гэв.

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.chuhal.mn хариуцлага хүлээхгүй.
Нийт сэтгэгдэл
  • Recent
  • Most Read
  • Most Comment