Жилийн өмнө АТГ-аас Халдварт өвчин судлалын үндэсний төвд ажиллаж захирал Д.Нямхүү нь хууль зөрчсөн болохыг тогтоосон байдаг. Тодруулбал Халдварт өвчин судлалын үндэсний төвийн захирал Д.Нямхүү нь өөртөө удаа дараа нийт 5 сая 500 гаруй мянган төгрөгийн урамшуулал, мөн нийт 3 сая 100 гаруй мянган төгрөгийн илүү цагийн хөлс олгосон байна. Энэ нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн холбогдох заалтуудыг зөрчсөн үйлдэл гэдгийг АТГ-аас тайлбарласан. Гэтэл тэрбээр албан тушаалдаа эргэн томилогджээ. Түүнийг “Шүүхийн шийдвэрээр албан тушаалдаа эргэн томилогдсон. Түүнийг ажлаас нь чөлөөлсөн нь хууль бус үйлдэл байсан гэдгийг шүүх тогтоосон учир албан тушаалдаа эргэн орсон" хэмээж байна.
Д.Нямхүүгийн хувьд дээрх хууль бусаар өөртөө цалин, урамшуулал нэмж олгодог, мөн илүү цагийн хөлс хэлбэрээр мөнгө авсан зэрэг ноцтой мэдээллүүдээс гадна зээл чөлөөлөх нэрийн дор бусдын орон байрыг луйвардсан, ХӨСҮТ Д.Нямхүүгийн танил тал гэх эрүүгийн элементүүд, хил даван хууль бус наймаа хийгчдийн “орогнодог” газар болсон тухай учир мэдэх хүмүүс ярьдаг. Түүнчлэн ХӨСҮТ шинэ жилийн арга хэмжээгээ 700 гаруй ажилтан нэг бүрийн цалин дээр 95.000 /ерэн таван мянган/ төгрөг нэмж шилжүүлчихээд, дараа нь үүнийгээ ажилтнуудаасаа эргүүлэн хураан авсан. Гэтэл цаад байгууллагатайгаа нэг ажилтны шинэ жилийн зардлыг 60.000 /жаран мянган/ төгрөгөөр тохирч хүн тус бүрээс 35.000, нийт 700 хүнээс 24.500.000 /хорин дөрвөн сая таван зуун мянган/ нийт төгрөгийн ашиг олж хувьдаа завшсан нь ХӨСҮТ-ийн олон арван эмч ажилчдын дургүйцлийг төрүүлсэн, “ЭБОЛА” вирус ид дэгдэж байх үед эмч, мэргэжилтнүүдийг гадаадад сургахаар төрийн зардлаар явуулахад мань эр “эсгий хийх газар нохой хэрэггүй” гэдэгчлэн эмч мэргэжилтнүүд дунд ороод төсвийн мөнгийг үрэн таран хийж аялаж зугаалаад ирсэн, Халдварт өвчин судлалын үндэсний төв хэмээх халдвар хамгааллын онцгой дэглэмийг сахих ёстой энэ газрын эргэн тойронд байх газар аль хэдийнэ зарагдаад, тэнд нь орон сууцны барилгууд сүндэрлэж, зарим нь Д.Нямхүү гэгчийн мэдэлд орсон байх магадлалтай зэрэг хэд хэдэн ноцтой асуудлыг ХӨСҮТ-ийн эмч ажилчид гаргаж тавьж байсан билээ.
АТГ зарим асуудлыг анхааралдаа авч, зөрчил гаргасан албан тушаалтныг хариуцлага тооцуулах чиглэлээр томилгоо хийх эрх бүхий албан байгууллагад нь албан бичиг хүргүүлсэн байдаг. Тэгвэл Г.Шийлэгдамба салбарын сайд байхдаа ХӨСҮТ-ийн захирал Д.Нямхүүг ажлаас нь чөлөөлсөн байдаг ч хэсэг хугацаан дараа тэрбээр эргэн томилогдсон байна.
